ماذا عن اخبار النت

ايه اخبار النت ياجماعه انا لحد دلوقتي لا اعرف شيئا عن هذا الموضوع ولما اتصلت بالشركة تي داتا قال المختص الكلام ده هيكون في شهر سبتمبر السنه دي طب ياعم كام الاشتراك قاللي هيكون 45 جنيه في الشهر قلت له يعني افتح النت طوال الشهر بالمبلغ ده قاللي لا بعد كده فيه حساب اسمه الجيجا يعني لما انت تاخد جيجا زيادة هتكون الجيجا الواحدة بمبلغ 10 جنيه او 8 جنيه طيب علشان انا ما ادفعش اكثر من 45 جنيه اعمل ايه قاللي شغل النت يادوب ساعتين في اليوم يعني الساعتين دول يادوبك علي ما الواحد يبص في النت تكون اكثر من ساعتين خلصوا وقعدت مع نفسي وحسبت الحسبه لما اخد ياواد في اليوم مثلا 4 ساعات يبقي انا هادفع في الشهر تقريبا 90 جنيه امال فين التخفيض اللي بيقولوا عليه المهم لما قعدت اسأل وهوه يجاوب قاللي بعد زهق وقرف كأني باشحت منه النظام القديم شغال والنظام الجديد شغال واللي يعجبك اشتغل عليه شفتوا الحكومة الرشيدة بتعمل ايخه للشعب

رسالة لوزير النقل والمواصلات

يا سيادة وزير النقل اللي اسمك منصور يابيه عربياتنا اتكسصرت واتحطمت من الطرق المكسرة يابيه مفيش في مصر المهروسة طريق سليم الواحد يمشي فيه فين الزفت والقطران وده منه كثير علشان سفلتتة الشوارع دي والا انت بتركب طياره تروح بيها الوزارة ياناس بصوا شوية للشعب وغيروا من حكومات الدول المتقدمه وبلاش انانيه وبلاش كلام بدون فعل ارحمونا من المطبات والمقبات وارحمونا من الشوارع المكسرة واتحضروا شويه وسفلتوا الشوارع وكفايه نهب خيرات البلد من غير ما تعملوا حاجة مفيدة نفتكركم بيها هو انت هتخلد في الوزارة ابدا كان غيرك اشطر ولو الكرسي ده دام لغيرك مكنش وصل ليك اعمل حاجه كويسة نترحم بيها عليك وافتكر كلام عمر بن الخطاب رضي الله عنه لما قال ( لو تعثرت بغلة في العراق لسئلت عنها ياعمر لم لم تمهد لها الطريق ) شوف الضمير الصاحي والضمير الحي لو اتكعبلت بغله في العراق مش في الوراق الا هل بغلت اللهم فاشهد

جراكن .......... وجراكن

البهوات اللي في حكومتناالرشيدة واللي اسمهم مجازا وزار ورجال اعمال دول مش عايشين في مصر ولا يعرفوا حاجة عنها لما يقول وزير الاسكان انه مفيش ازمة مياه في كفر الشيخ ولا البرلس ولا اسيوط وغيره وغيره ولما الصحف تصور الناس وهي شايله الجراكن علشان شوية ميه يبقي الوزير ده جاي من بلد غير البلد اللي هو عايش فيها الوزير اللي زي كده يبقي شيله من الوزارة احسن الوزراء بتوعنا بيستخدموا مياه معدنيه تيجي ليهم من الخارج وهمه بيستحوا بالمياه المعدنيه دي وبيشربوا منها علشان صحتهم وميجيش ليهم فشل كلوي ولا فشل كبدي لما يكون الوزير رئيس الوزراء بيستحم في حمام سباحه طول بعرض والحمام ده مليان مئات الامتار المكعبه من المياه علشان سيادته يغسل جتته فيها والشعب عطشان اللي زي ده حرام يقعد ولو دقيقة واحده في الوزارة المشكلة في مصر ان حكومتنا الرشيدة وهي ليست برشيدة مش عاوزة تخدم الشعب هي بتخدم نفسها فقط واللي يشوف الفساد والافساد اللي حاصل في البلد يتأكد من كلامي ده يا سيادة الوزير المسمي بالمغربي غربت شمسك ان شاء الله وربنا سبحانه وتعالي سوف يحاسبك حسابا عسيرا علي ما اقترفته من اثم في حق الشعب المسكين ومش هينفعك حد امام الله سبحانه وتعالي فاتق الله احسن واعمل لصالح الشعب المعدوم فانت مسئول امام الله

فضل الصلاة علي رسول الله صلي الله عليه وسلم

قال صلي الله عليه وسلم في حديث معناه ( من صلي علي صلاة صلي الله عليه بها عشرا ) اللهم صل وسلم وبارك علي سيدنا محمد عدد كمال الله وكما يليق بكماله هذه الصلاة احتسبها عند الله سبحانه وتعالي

وجاءت ساعة مولد الرسول عليه الصلاة والسلام

وتوالت بشري الهواتف ان قد ولد المصطفي وحق الهناء
وتداعي ايوان كسري ولولا آية منك ما تداعي البناء
وغدا كل بيت نار وفيه كربة من خمودها وبلاء
وعيون للفرس غارت فهل كان لنيرانهم بها اطفاء
مولد كان منه فلي طالع الكفر وبال عليهم ووباء
وروي الرواه ان السيدة / آمنه ام الرسول صلي الله عليه وسلم كانت تسمع قرب ولادته صوتا يقول ولا تري مصدره
اعيذه بالواحد من شر كل حاسد
وكل خلق زائد من قائم وحاصد
عن السبيل حائد علي الفساد جاهد
من نافث أو عاقد وكل خلق مارد
يأخذ بالمراصد في طرق الموارد
اتعلمون ياأحباب النبي محمد صلي الله عليه وسلم لماذا اهل الشرك والكفر يكرهون رسول الله صلي الله عليه وسلم لان مولده عليه الصلاة والسلام كان شؤما في طالع الكفر اذ اخذت معالمه تندثر ومظاهره تزول وعروشه تسقط وما هم بمالكين من أمرهم شيئا سوي الحسرات والآلام . ما أسعد أمة بهذا الفضل العظيم الذي تشرفت به النساء بحمل آمنه احمدا عليه السلام .

روتين اسمه الخوف من المسئولية

النهارده كنت في مدينة المنصورة علشان اقدم اوراق موكل للتسجيل في السجل العيني وكنت قد قدمت اوراق السجل العيني مستوفاه وفوجئت بالمراجع الفني يرفض طلب التسجيل بحجة انه فيه اشياء لم يتم استيفائها بعد ولما اطلعت علي اعتراضات المراجع الفني وجدت انه نقلها نقل مسطرة من اعتراضات سابقة تم تنفيذها ولما واجهته بهذا الكلام ارغي وازبد وقال اصله انا اخاف من المسئولية طب ياعم المسئولية اللي انت بتتكلم فيها لو كان الورق ده مش متراجع قبل كده او انا جبته عن طريق وسايط وعاوز اتجاوز منطقة المراجعه الفنيه ولكن لما يكون الورق كله سليم والاختام واضحه يبقي اللي بتعمله ده تعطيل مصالح المواطنين والنبي ده بالذمه ينفع يتعامل مع المواطنين بقي اقول حاجه الورق ده ليه سنتين بيتراجع اي والله سنتين وانا منصورة رايح جاي

عن الفساد في مصر حدث ولا حرج

الفساد في بلدنا مصر المحروسه اصبح شيء معتاد يعني الذمم الخربانه عندنا شيء عاد ي جدا وانا هاتكلم اليوم عن الرشاوي اللي يسموها اس الفساد لانك لا تستطيع تقضي لك اي مصلحه في اي ديوان للحكومة الا اذا دفعت المعلوم والمعلوم ده اصبح علي ايامنا السوده كبير يعني الموظف لازم ياخد مبلغ كبير علشان يخلص مصلحتك وانت ياولداه ساقط في وسط هدومك ومكسوف تدفع قدام الناس وهوه البعيدعينه فاجرة يقوللك ماتدفع ياساتاذ علشان تمشي ولا انت عايز تباتدي اسمها الرشوة الماديه وفي رشوه تانيه يقولوا عليها مجاملات وانا اسميها رشوة معنوية يعني ايه الكلام ده اقولك لما يروح واحد من عليه القوم لمصلحة حكومية يقضي فيها مصلحته تلاقي الموظفين اصبح عندهم نشاط وكل واحد عاوز يخلص مصلحته بسرعه وبعدين يقول له ابني او اخويا عايز يتوظف في المصلحه الفلانية يجي الشخصية الكبيرة دي يديله كارت توصية لفلان بك اللي في المصلحه المطلون التعيين فيها ويتم تعين قريب الموظف او مثلا انا شفت يعيني رأسي في مصلحة الشهر العقاري واحد شخصية من بتوع الامن عنده طلب عاوز يسجله في الشهر العقاري والطلب ده قرب يسقط لانه ما عملش ليه امتداد في الميعاد وصدقني المدير العام بجلالة قدره وكان بالمناسبة واحدة ست كانت مش عارفه تعمل ايه ولا ايه ولما طلبت منها اني اتقدم بشكوي ضد احدي الموظفات لانها متعنته في عملها معاي وان انا لي سنتيت علشان اسجل حته ورقه ومش عارف قالت بالحرف الواحد انا مش فاضية لك انا لازم اخلص موضوع البيه او والباشا هل عندنا احنا حاجة اسمها عدل او معامله الناس المعامله الكريمة بالطبع لا يعني من الاخر اذا كنت عاوز تخلص لك مصالح في دواوين الحكومة لازم يكون معاك مال قارون وعندك صبر ايوب وعمر سيدنا نوح او تكون من اصحاب الحظوة وانك ليك عازة في البلد دي يعني لازم حضرتك تكون ذو منصب وجاه واذا كنت من اصحاب المناصب الواطيه فمنه العوض وعليه العوض وقل علي نفسك السلام

كلمة حق يراد بها باطل

الدهماء الذين يسمون انفسهم القرآنيين وهم ينكرون السنة النبوية الشريفة هؤلاء لا ينتمون الي الاسلام ولا يحق لهم ان يقولوا عن انفسهم انهم مسلمون لان منكر السنة منكر ما هو معلوم من الدين بالضرورة والسنة النبوية الشريفة هي التي فسرت لنا ما جاء مجملا في القرآن الكريم وقال الله تعالي ( وما آتاكم الرسول فخذوه وما نهاكم عنه فانتهوا ) فرسول الله صلي الله عليه وسلم هو الذي فسر وبين طريقة الصلاة والصبح كام ركعه وكذلك باقي الاوقات من ظهر وعصر ومغرب وعشاء رسول الله صلي الله عليه وسلم هو الذي فسر لنا كل شيء مبهم او مجمل في القرآن الكريم فمنكر السنه منكر للقرآن ومنكر السنه كافر والعياذ بالله هؤلاء المدعون بالقرآنييين لا يأتي من ورائهم خير ويكفي انهم يمولون من امريكا ويكفي ببوش انه اراد تغيير آيات من القرآن الكريم فلا عجب ان ينكر هؤلاء الكفار السنه النبوية الشريفه وكان يجب علي علماء الازهر ان يردوا علي هؤلاء الدهماء ويوضحوا للعامة والخاصه اساليبهم الملتوية ويكشفون زيف ادعائهم حتي لا يقع الشباب فريسة لهؤلاء الغوغائيين وكم من اناس تهجموا علي الرسول الكريم صلوات ربي وسلامه وآله وهم ذهبوا ملعونين وبقي الرسول عليه الصلاة والسلام وبقيت سنته الطاهرة نقيه علي مر الزمان ولن يؤثر كلام هؤلاء الرعاء في شيء فالقافله تسير بينما الذئاب تعوي

وزراء آخر الزمان

جريدة الاهالي عملت كلام وزير الزراعة بتاع مصر والوزير ده متخصص في الزراعة الراجل مش عايز يتعب نفسه ويفكر فس سد العجز من القمح للشسعب الغلبان علشان يكل عيش فكر وقال شراء العبد ولا تربيته يعني نستورد قمح من الاجانب اللي بيصدروا لينا قمح مسرطن علشان باقي الشعب اللي لسه بصحته يجيي له المرض والسقم علشان الحكومة والوزراي ييرتاحوا لما يكون مفيش شعب فيه صحه هيناكف مع الحكومة الزاي خلاص يا سيادة الوزير تسييب الارض بور في مصر وتنفع اراضي الاجانب وتنفع العماله الاجنبيه هو حرام علي اولاد البلد لما يلاقوا شغل في الزراعة يااخي اذا ما كنتش عارف تمشي امورك في الوزارة استقيل وريحنا من افكارك النيرة دي وخليهالنفسك احنا كشعب عايزين وزير يخاف علي الشعب ويحاول بكل اخلاص ان يكون عندنا كفاية من القمح ولا مانحطش صباعنا تحت ضرس غيرنا لان ياباشا القمح صناعة استراتيجيه يعني مسألة حياه او موت وخللي عندك غيره من الدول اللي عندها زيادة في القمح وخليك زييهم وبلاش تصدعنا بافكارك السلبية دي ودمتم

ازمة اختلقها وزير تونسي

الوزيير التونسي اللي اسمه ابو بكر الاخزوري هذا الوزير الشقي التعس لا هم له ليل نهار الا مهاجمة البنات المحتشمات المحجبات هذا الوزير بتهم مرتديات الحجاب بالطائفية اي والله ارتداء الحجاب اصبح فتنه وطائفيه في نظر هذا الصعلوك التونسي والخطير في الامر ان هذا الوزير كالافعي ينفث سمومه في بنات تونس الفضليات عن طريق اصدار القرارات لانه والمصيبة الاكبر ان الوزير الشقي ده وزير الشئون الدينيه التونسية هل تتصورون ان الدين في تونس وضع في يد خائنة لله ولرسوله وللمؤمنين هذا الوزير المأجور سوف يلقي من الله سبحانه وتعالي غيا وانا سوف اسأله سؤال واحد فقط وهو هل تقبل علي بناتك ان تتعري امام الاجانب ! اذا قلت نعم فانت زنديق واذا قلت لا فانت كاذب منافق

مسلسل العطش لا زال مستمرا

لا زال مسلسل العطش مستمرا فقد وصلت الازمه الي مدينه المحله الكبري وهناك الناس فضلوا انهم يتحبسوا علي ان يعيشوا بدون مياه والله ده حرام علي المسئولين وربنا هينتقم منهم علي اللي بيعملوه في الناس ازاي يقدر المسول من دول ينام مليء جفنيه ازاي يقدر د/ احمد نظيف ينام ليله مرتاح البال والضمير وهناك في لبرلس والمحله وبلاد اخري الناس بتموت من العطش هل يستطيع رئيس الوزراء ان يقضي حاجته بالحمام دون ان يستبرأ من بوله او دون الاستنجاء هل يستطيع المحافظ من بتوع المظهرة والفشخره ان يذهب الي عمله بديوان محافظته دون ان يغسل وجهه بشوية ميه والمصيبة الكبري ان الجرايد الحكومية لم تذكر اي خبر عن هؤلاء الناس والجريدة الوحيدة اللي متابعه الموضوع ده هي جريدة المصري اليوم فألف مليون سلام وتحيه لجريدة المصري اليوم الصادقه مع نفسها وصادقه مع قرائها ملعونه جرايد الحكومة من اخبار واهرام وجمهورية وغيرهم اللي مش مهتمين بشئون العباد واهتمامهم منحصر في كيفيه ارضاء صاحب السلطان حتي لو كان ذلك فيه اغضاب لله سبحانه وتعالي علي كل حال كل واحد يعمل ما شاء له ان يعمل فاليوم عمل ولا حساب وغدا حساب ولا عمل .. الا هل بلغت اللهم فاشهد

عطشان دلوني علي السبيل

طبعا ده كان مطلع اغنية من اكثر من اربعين سنة لكن دلوقتي اصبح عندنا عطش حقيقي رغم وجود اطول نهر في العالم واعذب نهر هو نهر النيل ولكن كما قال الشاعر تموت الابل في البيداء عطشي والماء فوق ظهورها محمول اي والله عندنا نهر النيل وعندنا بلاد بحالها هتموت من العطش زي ما مات الزرع والضرع اللي بيحصل في البرلس شيء لا يصدقه عقل بلد بحالها ومحتالها تعيش من اشهر بدون ماء ولما فاض بها الكيل خرجت الناس للشوارع تروي عطشها والاغرب من الخيال ان المحافظ كأنه من كوكب آخر وكأنه مش مسئول عن شوية الناس دول وكأن الله سبحانه وتعالي مش هيحاسبة علي هذا الطناش الناس بتموت من العطش وهو كل همه المنصب بتاعه مش عاوز يسيب المحافظه بسبب عطش الناس وقال انه فيه مؤامرة علي هل ده اسلوب محافظ في بلد ه لو كان هذا المحافظ في دوله اجنبيه لكان حوكم بتهمة التقصير العمد ولو كان في بلد مثل اليابان لكان قد انتحر بسبب فشله في تدبير الماء اللازم لرعاياه لكن نقول ايه مفيش الا كلمة حسبنا الله ونعم الوكيل في هذا المحافظ